எம்.ஜி.ஆர்., நூற்றாண்டு விழா: திரையுலகம் சார்பில் ஓர் ஆண்டு கொண்டாடப்படுகிறது

எம்.ஜி.ஆர்., நூற்றாண்டு விழா: திரையுலகம் சார்பில் ஓர் ஆண்டு கொண்டாடப்படுகிறது

13 ஜன,2017 - 10:53 IST

எழுத்தின் அளவு:

மக்கள் திலகம் எம்.ஜி.ஆரின் நூற்றாண்டு வருகிற 17ந் தேதி தொடங்குகிறது. இதனை பல அமைப்பினரும் தனித்தனியாக கொண்டாட இருக்கிறார்கள். மக்கள் திலகம் எம்.ஜி.ஆர் அதிமுக தலைவர், தமிழக முதல்வர் என்றாலும் அடிப்படையில் அவர் சினிமாவில் சூப்பர் ஸ்டார். எனவே அவரது நூற்றாண்டை சிறப்பாக கொண்டாட தமிழ் திரையுலகம் முடிவு செய்திருக்கிறது.

இது தொடர்பான ஆலோசனைக் கூட்டம் நேற்று தயாரிப்பாளர் சங்கத்தில் நடந்தது. தமிழ் திரைப்பட தயாரிப்பாளர் சங்கத் தலைவர் கலைப்புலி எஸ்.தாணு, துணை தலைவர் கதிரேசன், இயக்குனர்கள் சங்கத் தலைவர் விக்ரமன், பொதுச் செயலாளர் ஆர்.கே.செல்வமணி, இணை செயலாளர் லிங்குசாமி, தென்னிந்திய நடிகர் சங்கத் தலைவர் நாசர், துணை தலைவர் பொன் வண்ணன், தென்னிந்திய திரைப்படவர்த்தக சபை பொதுச் செயலாளர் காட்டரகட்ட பிரசாத், தமிழ்நாடு திரையரங்க உரிமையாளர் சங்கத் தலைவர் ரோகினி பன்னீர் செல்வம். சென்னை மாநகர திரையரங்க உரிமையாளர்கள் சங்கத் தலைவர் அபிராமி ராமநாதன், விநியோகஸ்தர்கள் சங்கத் தலைவர் அருள்பதி, பெப்சி தலைவர் ஜி.சிவா. செயலாளர் செல்வராஜ், இயக்குனர்கள் பாரதிராஜா, கே.பாக்யராஜ் ஆகியோர் இந்த ஆலோசனை கூட்டத்தில் கலந்து கொண்டனர்.

பின்னர் அவர்கள் நிருபர்களிடம் கூறியதாவது: மக்கள் திலகம் எம்.ஜி.ஆர் எங்கள் திரையுலகத்தை சேர்ந்தவர். அவரது நூற்றாண்டை சினிமாவில் உள்ள அனைத்து அமைப்புகளும் ஒருங்கிணைந்து பிரமாண்டமாக கொண்டாட இருக்கிறோம். வருகிற 17ந் தேதி அபிராமி தியேட்டரில் இதன் துவக்க விழா நடக்கிறது. இதில் திரையுலக முன்னணியினர் திரளாக கலந்து கொள்கிறார்கள்.

வருகிற 17ந் தேதியிலிருந்து 2018ம் ஆண்டு ஜனவரி 17ந் தேதி வரை ஒரு ஆண்டுக்கு எம்.ஜி.ஆர் நூற்றாண்டு விழாவை கொண்டாடுகிறோம். என்ன மாதிரியான நிகழ்ச்சிகள், யார் யார் பங்கேற்கிறார்கள் என்ற விபரத்தை விரைவில் அறிவிப்போம். என்றனர்.