ஓட்டல் பிரச்சனைக்கு 'ஆணாதிக்கம்' என்ற வரலட்சுமி

ஓட்டல் பிரச்சனைக்கு 'ஆணாதிக்கம்' என்ற வரலட்சுமி

06 ஏப்,2017 - 11:07 IST

எழுத்தின் அளவு:

சமுத்திரக்கனி இயக்கத்தில் மலையாளத்தில் உருவாகி வரும் 'அப்பா' படத்தின் ரீமேக்கான 'ஆகாச மிட்டாய்' படத்தில் நடிக்க ஒப்பந்தமானார் வரலட்சுமி. படத்தின் பூஜையிலும் கலந்து கொண்டு சில காட்சிகளில் நடித்தவர் இரண்டு நாட்களிலேயே அந்தப் படத்திலிருந்து விலகுவதாக அறிவித்தார். அதோடு தயாரிப்பாளர்களை 'ஆணாதிக்கவாதிகள்' என்றும் டிவிட்டரில் குறிப்பிட்டிருந்தார். இந்த விவகாரம் தமிழ், மலையாளத் திரையுலகத்தில் ஒரு பரபரப்பை ஏற்படுத்தியது.

ஆனால், இந்த விவகாரத்திற்குக் காரணமே ஓட்டலில் தங்குவதுதான் பிரச்சனையை ஏற்படுத்தியிருக்கிறது. மலையாளப் படத்தில் நடிப்பதற்காக வரலட்சுமிக்கு ஒரு நாள் வாடகை 7000 ரூபாய் இருக்கும் ஒரு ஓட்டலில் தங்குவதற்கு ஏற்பாடு செய்திருக்கிறார்கள். வரலட்சுமியோ அந்த ஓட்டலில் நான் தங்க மாட்டேன், எனக்கு 12000 ரூபாய் வாடகை உள்ள மற்றொரு ஓட்டலில் ரூம் எடுத்துக் கொடுங்கள் என தயாரிப்பாளரிடம் வாக்குவாதம் செய்திருக்கிறார். தங்களால் அந்த அளவிற்கு செலவு செய்ய முடியாது என தயாரிப்பாளர் தரப்பில் தெரிவித்திருக்கிறார்கள். இந்த வாக்குவாதம் மோதலில் முற்றியுள்ளது.

விஷயத்தைக் கேள்விப்பட்ட இயக்குனர் சமுத்திரக்கனியும், ஜெயராமும், வரலட்சுமியிடம் பேசி முடிந்தால் படத்தில் நடியுங்கள், இல்லையென்றால் பிரச்சனை செய்யாமல் விலகிவிடுங்கள் என்று சொல்லியிருக்கிறார்கள். அவர்கள் பேச்சைக் கேட்ட வரலட்சுமி உடனே படத்திலிருந்து விலகிவிடுவதாக அறிவித்துள்ளார். இப்போது அவர் நடிக்க வேண்டிய கதாபாத்திரத்தில் இனியா நடித்துக் கொண்டிருக்கிறார்.

ஒரு ஓட்டல் பிரச்சனைக்காக 'ஆணாதிக்கம்' என்ற வார்த்தைகளை வரலட்சுமி பயன்படுத்தியது தயாரிப்பாளர்களுக்கு கடும் கோபத்தை ஏற்படுத்தியுள்ளதாம்.