ஆயிரத்தில் ஒருவன் படப்பிடிப்பில் ஆயிரத்தில் ஒருத்தியான ஜெயலலிதா

ஆயிரத்தில் ஒருவன் படப்பிடிப்பில் ஆயிரத்தில் ஒருத்தியான ஜெயலலிதா

07 டிச,2016 - 08:26 IST

எழுத்தின் அளவு:

மக்கள் திலகம் எம்.ஜி.ஆர் ஒரு நடிகையிடம் இருக்கும் திறமையை சரியாக கணிப்பார். அப்படிப்பட்டவர்களை தேர்வு செய்து தனது அடுத்தடுத்த படங்களில் நடிக்க வைப்பார். நாடோடி மன்னன் படத்தில் சிறிய வேடத்தில் நடிக்க வந்த சரோஜாதேவியை அப்படித்தான் தேர்வு செய்து தன்னுடன் பல படத்தில் நடிக்க வைத்தார். லதாவும் அப்படித்தான். ஆனால் இவர்கள் இருவருக்கும், ஜெயலலிதாவுக்கும் வித்தியாசம் உண்டு. ஜெயலலிதாவை அறிமுகப்படுத்தியது எம்.ஜி.ஆர் அல்ல... ஸ்ரீதர். தனது வெண்ணிற ஆடை படத்தில் அறிமுகப்படுத்தினார். அந்த படத்தை பார்த்த எம்.ஜி.ஆர் ஆயிரத்தில் ஒருவன் படத்தில் நடிக்க வைத்தார். இரண்டாவது படத்திலேயே நம்பர் ஒண் ஹீரோவுடன் நடிப்பது என்பது ஜெயலலிதாவுக்கு கிடைத்த மிகப்பெரிய அங்கீகாரம். அந்த படத்தின் படப்பிடிப்பின்போதே அவருக்கு பாடும் திறன் இருப்பதையும் கண்டுபிடித்து பாடவும் வைத்தார்.

ஆயிரத்தில் ஒருவன் படப்பிடிப்பு கோவா அருகே உள்ள கர்வார் பகுதியில் உள்ள ஒரு குட்டித் தீவில் நடந்தது. அந்த தீவில் தங்கும் வசதி இல்லாததால் கோவாவில் தங்கி தினமும் மூன்

று மணி நேரம் பயணம் செய்து அந்த தீவுக்கு செல்வார்கள். ஒரு நாள் படப்பிடிப்பு குழுவினர் ஜெயலலிதாவை விட்டுச் சென்று விட்டனர். அவருக்கு டூப் போட்ட நடிகை அவரைப்போலவே உடை அணிந்து முகத்தை முக்காடிட்டு சென்றதால் அவர்தான் ஜெயலலிதா என்று கருதி அழைத்துச் சென்று விட்டனர். ஜெயலிதா கிளம்பிவிட்டு வந்த பார்த்தால் யாரும் இல்லை. ஆனாலும் அவர் அதற்காக பயப்படவில்லை.

அங்குள்ளவர்களை விசாரித்து அந்த தீவுக்கு போக வேண்டும் என்றார். "சுற்றிப்போனால்தான் 3 மணி நேரம் கட்டுமரத்தில் போனர் 30 நிமிடத்தில் போய்விடலாம். ஆனால் கடல் அலை இருக்கும், உயிருக்கு உத்தரவாதம் கிடையாது. அதோடு இளம் பெண்ணான நீங்கள் மீனவர்களுடன் கடலுக்குள் தனியாக செல்வது அவ்வளவு பாதுகாப்பானதல்ல" என்றார்கள். "பரவாயில்லை" அதை நான் பார்த்துக் கொள்கிறேன்" என்றார் ஜெயலலிதா. மீனவர்களின் ஏற்பாட்டின் படி கட்டுமரத்தில் பயணித்து படப்பிடிப்பு குழுவினருக்கு முன்பாகவே அந்த தீவை அடைந்தார். விஷயத்தை கேள்விப்பட்ட எம்.ஜி.ஆர் "படத்தில்தான் நான் ஆயிரத்த்தில் ஒருவன். நீ நிஜத்தில் ஆயிரத்தில் ஒருத்தி" என்றார். அன்று ஆயிரத்தில் ஒருத்தியாக இருந்தவர் இன்று பல்லாயிரம் கோடியில் ஒருத்தியாக வாழ்ந்து காட்டி மறைந்திருக்கிறார்.