ஒப்பந்தம் செய்யாத படங்களில் நடிக்க வற்புறுத்தல், சட்டப்படி சந்திப்பேன்: சிவகார்த்திகேயன் கடிதம்

ஒப்பந்தம் செய்யாத படங்களில் நடிக்க வற்புறுத்தல், சட்டப்படி சந்திப்பேன்: சிவகார்த்திகேயன் கடிதம்

18 அக்,2016 - 15:36 IST

எழுத்தின் அளவு:

நடிகர் சிவகார்த்திகேயன் தனது ரெமோ படத்தின் வெற்றி விழாவில் "என்னை தொழில் செய்ய விடாமல் தடுக்கிறார்கள்" என்று கண் கலங்கினார். அவர் தயாரிப்பாளர் ஞானவேல்ராஜா, எஸ்கேப் ஆர்ட்டிஸ்ட் மதன், வேந்தர்மூவீஸ் மதன் ஆகியோரிடம் படம் நடித்து தருவதாக ஒப்பந்தம் போட்டு தற்போது நடிக்க மறுப்பதாக கூறப்பட்டது. இது குறித்து தயாரிப்பாளர் சங்கமும், தென்னிந்திய நடிகர் சங்கமும் பேச்சு வார்த்தை நடத்தி வருகிறது. இந்த நிலையில் சிவகார்த்திகேயன் தென்னிந்திய நடிகர் சங்கத்திற்கு ஒரு கடிதம் எழுதியுள்ளார்.

அந்த கடிதத்தில் அவர் கூறியிருப்பதாவது: என்னிடம் கால்ஷீட் கேட்டு 2013-ம் ஆண்டு தயாரிப்பாளர்கள் ஞானவேல்ராஜா, எஸ்கேப் ஆர்ட்டிஸ்ட் மதன், வேந்தர் மூவிஸ் மதன் ஆகிய 3 பேர் அணுகினார்கள். இதில் ஞானவேல்ராஜா படத்தில் நடிப்பதற்கு மட்டும் ஒப்பந்தம் போடப்பட்டது. மற்ற இருவரின் படங்களில் நடிக்க வாய்மொழியாகவே பேசப்பட்டது. இதற்காக அவர்களிடம் முன்பணம் எதுவும் வாங்கவில்லை. இப்போது எனது மார்க்கெட் நிலவரம் உயர்ந்துள்ள நிலையில் அவர்கள் மூன்று பேரும் வந்து தங்கள் படங்களில் நடித்துக் கொடுக்கும்படி வற்புறுத்துகிறார்கள்.

ஞானவேல்ராஜாவிடம் ஒப்பந்தம் போட்டு இருப்பதால் அவர் படத்தில் நடித்துக் கொடுப்பேன். ஆனால் மற்ற இருவரின் படங்களிலும் நடிக்க முடியாது. அவர்களிடம் ஒப்பந்தம் எதுவும் போடவில்லை. இந்த பிரச்சினையை சட்ட ரீதியாக சந்திக்க தயாராக இருக்கிறேன். இவ்வாறு அந்த கடிதத்தில் சிவகார்த்திகேயன் குறிப்பிட்டுள்ளார்.

இந்த கடிதத்தின் நகலை நடிகர் சங்கம், தயாரிப்பாளர் சங்கத்திற்கு அனுப்பி வைத்துள்ளது. தயாரிப்பாளர் சங்கம் இதுகுறித்து இன்று ஆலோசனை நடத்துகிறது.