டாஸ்மாக்கிற்கும், எனக்கும் எந்த சம்பந்தமும் இல்லை

டாஸ்மாக்கிற்கும், எனக்கும் எந்த சம்பந்தமும் இல்லை

19 மே,2017 - 01:37 IST

எழுத்தின் அளவு:

கட்டாய வெற்றியை எதிர்பார்த்து காத்திருக்கும் ஜீவாவின் அடுத்த படம், சங்கிலி புங்கிலி கதவ தொற. இயக்குனர் அட்லி தயாரிப்பில், எம்.ஆர்.ராதா பேரனும், கமல் படங்களில் உதவி இயக்குனராக பணியாற்றியவருமான, ஐக் இயக்கத்தில் தயாராகியுள்ள இந்த படம் பற்றியும், தன்னை பற்றியும், மனம் திறந்து பேசுகிறார் ஜீவா.

அதென்ன சங்கிலி புங்கிலி என, ஒரு தலைப்பு?

இந்த படம், திகில் கலந்த காமெடி கதையை மையமாக வைத்து தயாராகி உள்ளது. ஒரு வீட்டில் பேய் இருக்கும். அந்த பேயைச் சுற்றி நடக்கும் சம்பவங்கள் தான், கதை. ஸ்ரீதிவ்யா, ராதாரவி, ராதிகா, சூரி என, ஒரு நட்சத்திர பட்டாளமே படத்தில் இருக்கு.

நீங்க, விஷால் அணியைச் சேர்ந்தவர்; ஆனால், எதிர் அணியைச் சேர்ந்த ராதாரவி, ராதிகாவுடன் இந்த படத்தில் சேர்ந்து நடித்தது எப்படி?

சரத்குமார், ராதிகா, ராதாரவி போன்றவர்கள் எல்லாம், என் அப்பாவின் நண்பர்கள். சரத் சார், எங்கள் தயாரிப்பில், பல படங்களில் நடித்திருக்கிறார். அதனால், எங்களுக்குள் எந்த பிரச்னையும் இல்லை. நடிகர் சங்க தேர்தல் அன்று, ஓட்டுப் போட்டு விட்டு வரும் போது, என்ன ஜீவா, உன்னோடு நடிக்க தேதி கொடுத்திருக்கிறேன் என, அவரே வந்து பேசினார்.

எல்லா துறையிலும் ஒரு மாற்றம் வருவது நல்லது தானே; நாளைக்கு, விஷால் மாதிரி வேறு ஒருவர், நல்ல திட்டங்களுடன் வந்தால், அவரை ஆதரிப்போம். நடிகர்களுக்குள் எந்த கருத்து வேறுபாடும் இல்லை.

வெற்றி - தோல்வியை எப்படி எடுத்துக்குறீங்க?

நம்மை நம்பி, காசு போட்ட தயாரிப்பாளர்களுக்கு, கட்டாயம் லாபம் சம்பாதித்து கொடுக்க வேண்டும். படம் தோல்வி அடைந்தால், அதற்கான காரணத்தை அறிந்து கொள்ள முயற்சிக்க வேண்டும். இவ்வளவு நாள் உழைப்பு, வீணாகி விட்டதே என, வருத்தம் இருக்கும். ஆனால்,

அதையும் ஒரு படிப்பினையாக எடுத்துக் கொள்ள வேண்டும்.

எந்த நடிகருடன் சேர்ந்து நடிக்க ஆசை?

எல்லாருமே இப்போது,பிசியான நடிகர்களாக இருக்கிறோம். அவர்களுக்கு தொல்லை தர விரும்பவில்லை. அவர்களது மார்க்கெட்டை கெடுக்க விரும்பவில்லை. ஆனால், சரியான கதையும், அதற்கு ஏற்ற தயாரிப்பாளர்களும் கிடைத்தால், யார் கூட வேண்டுமானாலும் நடிக்க தயார்.

மச்சி, ஒரு குவாட்டர் சொல்லு என, நீங்கள் கூறிய டயலாக், இன்னும் பேசப்படுகிறதே?

அது, உண்மை தாங்க. என்னை, டாஸ்மாக் பிராண்ட் அம்பாசிடரா நினைச்சிட்டாங்க போலிருக்கிறது. அந்த டயலாக்கை பேசும் போது, இந்த அளவுக்கு பிரபலமாகும் என தெரியாது. சமீபத்தில், ஒரு ஏரியாவில், டாஸ்மாக் கடை மூடியதற்கு, ஒருவர் என்னிடம் வந்து வருத்தப்பட்டார்.

எனக்கும், இந்த விஷயத்துக்கும் சம்பந்தம் இல்லை என, அவரிடம் சொல்லி அனுப்பிவிட்டேன். குடும்பத்துடன் கோவிலுக்கு போனாலும், ரசிகர்கள் சிலர், இந்த டயலாக்கை சொல்லி குரல் எழுப்புகின்றனர்.

இதை எல்லாம் விட கொடுமையான விஷயம் என்ன தெரியுமா; என் பையனுக்கு, ஆறு வயது ஆகிறது. எல்லாரும் இதைப்பற்றி பேசுவதை கவனித்த அவன், டாடி, வாட் இஸ் குவாட்டர் என, கேட்கிறான். எனக்கு ரொம்ப கஷ்டமாக போய்விட்டது.