மும்பை திரைப்பட விழா'வில் 'பாகுபலி 2' படத்தின் ஃபர்ஸ்ட்லுக் டீஸர்
18 அக்,2016 - 17:38 IST
'பாகுபலி' தெலுங்குப் படத்தின் மாபெரும் வெற்றிக்குப் பிறகு அப்படத்தின் 2ஆம் பாகம் உருவாகி வருகிறது. முதல் பாகத்தைவிட மேலும் பிரம்மாண்டமாய் எடுக்கப்பட்டு வரும் இப்படத்தின் படப்பிடிப்பு கிட்டத்தட்ட 1 வருடத்திற்கும் மேலாக நடந்து வருகிறது. இப்படத்தின் படப்பிடிப்பு விறுவிறுப்பாக நடைபெற்று தற்போது இறுதிகட்டத்தை எட்டி வருகிறது. அடுத்த வருடம் ஏப்ரலில் பாகுபலி-2 திரைக்கு வர இருக்கிறது.
படம் வெளியாக ஆறு மாதங்களுக்கு மேல் ஆனாலும் இப்போதே இப்படத்தின் வியாபாரம் தொடங்கி விட்டது. 'பாகுபலி 2' படத்தின் ஹிந்தி விநியோக உரிமையை பிரபல பாலிவுட் இயக்குநர் கரண் ஜோஹர் மிகப்பெரிய விலை கொடுத்து வாங்கியிருக்கிறார். அதோடு அதன் சாட்டிலைட் ரைட்ஸும் எந்த தென்னிந்திய படத்திற்கும் இல்லாத அளவுக்கு மிகப்பெரிய விலைக்கு விற்கப்பட்டிருக்கிறதாம்.
இந்நிலையில், வரும் 20ஆம் தேதியிலிருந்து 27ஆம் தேதி வரை நடைபெற உள்ள 18-ஆவது மும்பை திரைப்பட விழா'வில் 'பாகுபலி 2' படத்தின் ஃபர்ஸ்ட்லுக் போஸ்டர், மேக்கிங் வீடியோ, டீஸர், கிராபிக் நாவல் பிரிவியூ ஆகியவற்றை வெளியிடவிருக்கின்றனர். அக்டோபர் 22ஆம் தேதி மாலை 4 மணியளவில் இந்த நிகழ்வு நடைபெறவிருப்பதாக அதிகாரபூர்வமாக அறிவிக்கப்பட்டுள்ளது. அதோடு, முதல்முறையாக 360 டிகிரி மேக்கிங் வீடியோவையும் வெளியிடுகிறார்கள்.
விர்ச்சுவல் ரியாலிட்டி என்றழைப்படும் விஆர் கண்ணாடிகளை அணிந்து பார்க்கும் வகையில் 'பாகுபலி 2' படத்தின் டீஸரையும் வெளியிடஉள்ளனர். ஒரு படத்தை வைத்துக் கொண்டு கோடிக்கணக்கில் லாபம் பார்ப்பது எப்படி என்பதை பாகுபலி தயாரிப்பாளரிடம்தான் கற்றுக் கொள்ள வேண்டும்.
0 comments:
Post a Comment