தமிழ் சினிமாவை காப்பாற்றுங்கள்: தமிழக அரசுக்கு விஷால் கோரிக்கை

தமிழ் சினிமாவை காப்பாற்றுங்கள்: தமிழக அரசுக்கு விஷால் கோரிக்கை

10 ஜூலை, 2017 - 12:29 IST

எழுத்தின் அளவு:

பிரசாத் பிக்சர்ஸ் சார்பில் பி.வி.பிரசாத் தயாரித்து, இசை அமைத்து இயக்கி இருக்கும் படம் சகுந்தலாவின் காதலன். இதன் இசை வெளியீட்டு விழா நேற்று மாலை காமராசர் அரங்கில் நடந்தது. இதில் கலந்து கொண்டு தயாரிப்பாளர் சங்கத் தலைவர் விஷால் பேசியதாவது:

இந்த படத்தின் இசை உரிமையை நான் வாங்கி இருக்கிறேன். ஏன் என்றால் நிறைய பேர் படத்தின் இசை உரிமையை வாங்குகிறார்கள். ஆனால் தயாரிப்பாளருக்கு முழுமையான தொகை வருவதில்லை, குறைவான விலைக்கு வாங்கி அதிக லாபம் சம்பாதிக்கிறார்கள்.

இந்த நேரத்தில் மாநில அரசுக்கு ஒரு வேண்டுகோள் வைக்கிறேன். சினிமாவை காப்பாற்றுங்கள் ஜி.எஸ்.டி, வரிக்கு மேல் இன்னொரு வரியை போட்டு கஷ்டபடுத்த வேண்டாம். நான்கு பேர் கொண்ட ஒரு குடும்பம் தியேட்டருக்கு வரும்போது, பார்கிங் கட்டணம், ஆன்லைன் கட்டணம், தின்பண்டங்கள் கட்டணம் என அதிக தொகை செலவிட வேண்டி உள்ளது.

இவ்வளவு வருமானம் வந்தாலும் தயாரிப்பாளர்களுக்கு வருமானம் வருவதில்லை. அதை சரி செய்ய வேண்டும். தியேட்டர்களுக்கு ரசிகர்களை வர வைக்க வழிவகை செய்ய வேண்டும். இதையெல்லாம் சொன்னால் என்னை வில்லன் என்று சொன்னாலும் எனக்கு கவலை இல்லை, தமிழ் சினிமா காப்பாற்றப்பட வேண்டும். என்றார் விஷால்.

விழாவில் முன்னாள் அமைச்சர் ஆற்காடு வீராசாமி, தயாரிப்பாளர் சங்க செயலாளர் கதிரேசன், பொருளாளர் எஸ்.ஆர்.பிரபு, தமிழ்நாடு திரையரங்க உரிமையாளர்கள் சங்க தலைவர் ரோகிணி பன்னீர் செல்வம், பெப்ஸி தலைவர் ஆர்.கே.செல்வமணி, இயக்குனர்கள் சங்க தலைவர் விக்ரமன் மற்றும் இயக்குனர்கள் மனோஜ்குமார், ஆர்.வி. உதயகுமார், நடிகர்கள் மன்சூர்அலிகான், கருணாஸ் தயாரிப்பாளர்கள் ஜி.கே.ரெட்டி, கே.எஸ்.ஸ்ரீனிவாசன், பட்டியல் சேகர் எஸ்.எஸ்.துரைராஜ், உள்பட பலர் கலந்துகொண்டனர்.