பிச்சை எடுத்த நடிகருக்கு உதவிய நட்சத்திரங்கள்

பிச்சை எடுத்த நடிகருக்கு உதவிய நட்சத்திரங்கள்

05 ஜூலை, 2017 - 12:38 IST

எழுத்தின் அளவு:

காதல் படத்தில் சினிமா வாய்ப்பு கேட்டு அலைபவராக நடித்தவர் விருச்சிககாந்த் என்ற பல்லு பாபு. "முதல்ல வில்லன் அப்புறம் ஹீரோ, அப்புறம் சிஎம். அப்புறம் பிரைம் மினிஸ்டர் இதாங்க என்னோட பிளான்" என்று அவர் சொல்லும் வசனம் மிகவும் பிரபலம்.

அதன் பிறகும் சில படங்களில் காமெடி வேடத்தில் நடித்தவர், சரியான வாய்ப்புகள் இல்லாமல் எங்கிருக்கிறார் என்றே தெரியாமல் இருந்தது. கடந்த வாரம் அவர் ஒரு கோவிலில் பிச்சை எடுத்துக் கொண்டிருப்பதாக செய்திகள் வெளிவந்தது. இதை அறிந்த நடிகர் சாய் தீனா மற்றும் இயக்குநர் மோகன் ஆகியோர் அவரை மீட்டு அடைக்கலம் கொடுத்தனர். மேலும் அவருக்கு உதவும்படியும் கேட்டு கொண்டனர். தற்போது நடிகர் அபி சரவணன் மற்றும் அவரது நண்பர்கள் பாபுக்கு தேவையான உதவிகளை செய்துள்ளனர்.

இதுகுறித்து அபி சரவணன் கூறியதாவது: மனதை ஒருவாரமாக உறுத்திகொண்டிருந்த ஒரு செய்தி.. பிச்சை எடுத்த நடிகர் விருச்சிககாந்த் என்பதுதான். அவரை கண்டுபிடிக்க முயற்சி செய்தும் இயலாத நிலையில் வாட்ஸ் அப் வீடியோல் இருந்தவர் மூலமாக கண்டுபிடித்தோம். என்ன வேண்டும் என்று கேட்டதற்கு சினிமாவில் நல்ல வாய்ப்பும், தங்க இடமும் , தொடர்புகொள்ள ஒரு மொபைல்போனும் , நல்ல உடையும் போதும் என்றார். உடனடியாக அவருக்கு தேவையான ஒரு புதிய சாம்சுங் ஆண்ட்ராய்டு மொபைல் போனும். ஒரு செட் உடையும் நண்பர்கள் இணைந்து வழங்கினோம்.

தற்போது சென்னையில் படப்பிடிப்பு நடந்து கொண்டிருக்கும் எனது படத்தின் இயக்குனரை தொடர்பு கொண்டு தகவலை கூறியவுடன், அவருக்கான நடிப்பு வாய்ப்பை வழங்கினார். மேலும் அடுத்த வாரமே தொடங்க இருக்கும் எனது புதுப்படமான "சூறாவளி"யின் இயக்குனர் குமார் நந்தாவும், விருச்சிககாந்த் நடிக்க வாய்ப்பு வழங்கினார்.

மன்சூரலிகான் அவரின் அடுத்த படத்தில் நடிக்க வாய்ப்பு வழங்கி உள்ளார். பெங்களூருவை சேர்ந்த பேஷன் டிசைனர் கிரிஷ், விருச்சிககாந்த் மனநல சிகிச்சைக்கு உதவுவதோடு அவரை மாடலாகவும் பயன்படுத்தி கொள்கிறேன் எனவும் உறுதி அளித்துள்ளார். என்கிறார் அபி சரவணன்.