பெற்றவர்களை பழிவாங்கும் குழந்தை பேய்

பெற்றவர்களை பழிவாங்கும் குழந்தை பேய்

07 ஜூலை, 2017 - 10:44 IST

எழுத்தின் அளவு:

புதுசு புதுசா பேய் படங்களின் கதையை கோடம்பாக்க முழுக்கவே ரூம் போட்டு யோசிப்பார்கள் போலிருக்கிறது. விதவிதமான பேய் படங்களாக எடுத்து தள்ளுகிறார்கள். தன்னை சரியாக கவனிக்காமல் தன் சாவுக்கு காரணமான பெற்றவர்களை பழிவாங்குகிற குழந்தை பேய் படம் ஓவியா. இதைப் பற்றி அதன் இயக்குனர் கஜன் சண்முக நாதன் கூறியதாவது:

இன்றைய எந்திரமயமான, அதேசமயம் வேகமாகிப்போன வாழ்க்கை சூழலில் பெரும்பாலான கணவன்-மனைவியர்க்கிடையே சரியான புரிதல் இல்லாத நிலைதான் இருக்கிறது. அதுவே இவர்கள் பெற்றோர்களாக மாறிய பின்பும் இந்த புரிதல் இல்லாமை தொடர்வதால், பாதிக்கப்படுவது பெரும்பாலும் அவர்களது குழந்தைகள் தான். அப்படி ஒரு தம்பதியின் குழந்தை ஒன்று, அதன் பெற்றோர்களுக்கிடையே ஏற்படும் கருத்து வேறுபாடு, சண்டையினால் சரியான கவனிப்பின்மை காரணமாக இறந்து பேயாக மாறுகிறது. அதன்பின் தனது இந்த நிலைமைக்கு காரணமான தனது பெற்றோருக்கு அது பாடம் புகட்டுகிறதா, இல்லை பாவம் என விட்டுவிடுகிறதா என்பது தான் படத்தின் கதை.

மலையும் மலைசார்ந்த இடமும் தான் கதைக்களம் என்பதால் இந்தப்படத்தின் பெரும்பாலான காட்சிகள் கேரளாவில் படமாக்கப்பட்டு வருகின்றன. தற்போது இந்தப்படத்தின் இறுதிக்கட்ட படப்படிப்பு நடைபெற்று வருகிறது. காண்டீபன், மிதுனா என்ற புதுமுகங்கள் நடிக்கிறார்கள். சுவிக்ஷா ஜெயரத்னம் என்ற குழந்தை நட்சத்திரம் ஓவியா என்கிற பேயாக நடிக்கிறார். நிஷாந்தன், விபின் சந்திரன் ஒளிப்பதிவு செய்கிறார்கள், பத்மஜன் இசை அமைக்கிறார்.